Galuega fa’alauiloa o le Tusigaigoa o tagata ma fale 2021 mo le Atunuu Lautele

O le aso 19-23 o Iuni,2023 sa faatinoina ai le galuega  faalauiloa a le Vaega o Tusigaigoa ma Suesuega Laiti mo le motu o Savaii ae o le aso 27-28 o Iuni mo le motu o Upolu ma  faamaeaina ai i le aso 4 o Iulai. O lenei faalaulioa sa faatinoina i maota o Fono Faavae na filifilia mo le 12 o Itumalo Faafaipule o Savaii ae 4 mo Upolu.

O le sini autu o lenei faalauiloa o le faailoaina lea o faamaumauga na aoina mai le Tusigaigoa o Tagata ma Fale 2021, e patino tonu lava i Itumalo na filifilia. Sa faatinoina se folasaga e faailoa ma faamatala ai le taunuuga o faamaumauga na aoina mo le silafia ai o sui o Fono Faavae na filifilia. O nisi o nei faamaumauga e aofia ai vaega ua taua I lalo;

·         Faitau aofai o le Itumalo i alii ma tamaitai

·         Fa’amaumauga mo tausaga po’o le matutua o tagata o le Itumalo

·         Fa’amaumauga o tapuaiga lotu o lo’o agai iai tagata o le Itumalo

·         Fa’amaumauga i aoaoga ma tusi pasi ua ausia e i latou e 3tausaga ma luga atu

·         Galuega o lo’o galulue ai i latou e 15 tausaga ma sili atu  o le Itumalo

·         Fa’amaumauga o i latou e 5tausaga ma sili atu e iai a’afiaga tumau o le soifua i totonu o le Itumalo

·         Fa’amaumauga o i latou 21 tausaga ma sili atu e iai suafa matai

·         Fa’amaumauga o le aofai o auaiga i totonu o le Itumalo

·         Fa’amaumauga i auaunaga o lo’o fa’aogaina e pei o le vai ma le eletise

·         Fa’amaumauga o auala o feso’otaiga

·         Fa’amaumauga o auala o femalagaina

·         Fa’amaumauga o le aofai o aiga na auai o latou sui i galuega fa’avaitaimi

I le maea ai o le faalauiloa sa faamauina le agaga faafetai o sui auai mo le folasaga na faatinoina ua maua ai se malamalama I le tulaga o loo I ai Itumalo ma faamaumauga ua patino mo I latou aua le faatinoina o nisi o a latou fuafuaga fai aemaise o Faiga faavae ma taiala e lima taitaiina ai fuafuaga a Fono Faavae.Na maea le faalauiloa ma faamauina ai le talosaga mai Itumalo uma na faatino ai le polokalame ina ia faaauau lenei polokalame I le agai ai I le lumanai pea maea faatino le Tusigaigoa o Tagata ma Fale I soo se tausaga.

E fia faaleoina foi le agaga faafetai o le Afioga i le Ofisa Sili, le Pulega ma le Ofisa o Fuainumera Faamauina  i le Paia maualug i Afioga i  Taitaifono aemaise le Nofo a Tofi ma le laulau a Komiti o Fono Faavae sa faatino ai le polokalame mo le faaavanoaina o latou taimi aemaise o faasoa sa faatinoina aua le faaleleia atili o le galuega mo le agai ai I le lumanai aemaise o le MANUIA o Samoa mo taeao e a ala I le auauanaga Faafuainumera.Ia saga FAAMANUIA E ALII.